徐淑敏（Suki）早前榮升嫲嫲，家中的貓兒誕下四胞胎，熱鬧了不少，更為她帶來不少工作運，行騷行不停，荷包迅速膨脹，Suki大讚貓兒是招財貓，對牠們寵愛有加。
徐淑敏（Suki）自幼受外祖母感染，喜歡飼養貓咪，家中一直養了兩頭貓，分別是雄貓「忌廉」和雌貓「梳打」，早前牠們更造貓成功，誕下四胞胎，可惜其中一隻夭折，Suki對活下來的三隻乖孫愛護有加，等牠們稍為長大便分送給親友。
奀仔改名小忌廉
不用工作時，Suki會親自照顧貓咪的起居，包括替牠們清理便盆和冲凉，她說：「當初買忌廉同梳打返嚟，我都係諗住畀佢哋生一胎，我唔會剝削佢哋做父母嘅權利，不過忌廉日前已經做咗絕育手術，而梳打就要餵奶，佢產後都收身收得好快，等遲少少，我都會送佢去獸醫度做絕育手術。」Suki把大B和中B分別送給姊姊和朋友，由於細B比較孱弱，所以她留下孻仔自己照顧，她說：「佢生出嚟嘅時候好遲先開眼，所以遲咗飲奶，身體比較孱弱，我就唔捨得將佢送畀人，索性將佢留喺身邊，之前叫佢『奀仔』，不過𠵱家見佢都幾靚仔，幫佢改咗個新名做『小忌廉』。」
自從Suki的貓咪添丁後，榮升嫲嫲的她工作運提升，荷包賺到脹卜卜，Suki大讚家中的招財貓為她帶來好運，她說：「係呀，自從生咗貓仔，我工作運旺咗，佢哋真係我嘅招財貓。」
拍鄧萃雯壓力大
此外，備受無綫力捧的Suki，稍後會開拍新劇《妻妾成群》，她會跟吳卓羲扮演一對，而鄧萃雯則扮演她的胞姊，Suki說：「可以同佢哋合作，真係一個好好嘅機會，但同雯女合作好有壓力，因為佢係好戲之人，所以我要做好啲功課。」
採訪：比華利
