現時香港都有日職聯的直播，球迷往後要留意一個球證名叫家本政明，佢係日本家傳戶曉嘅職業球證，並經常出現爭議性判決。
早於05年日乙聯賽草津溫泉對鳥棲砂岩，當時草津球員高須洋平意外倒地，家本政明判罰12碼，並向砂岩球員八田康介出示黃牌。事後，高須洋平承認冇受過侵犯，日聯紀律小組取消八田康介黃牌，鳥棲砂岩教練松本育夫憤怒炮轟家本政明執法水平。
導師陳譚新陳蔭明
06年9月，日職聯決定派家本政明到香港交流一個月，他回到日本後，執法水準果然大有改善，判斷準確，和助理球證溝通亦相當好，這有賴香港兩名高質素球證導師，包括曾執法世界盃嘅陳譚新及陳蔭明從旁協助。不過，今年3月家本政明再度成為焦點，佢喺日超盃鹿島鹿角對廣島三箭賽事中，共派出11張黃牌及3張紅牌，憤怒嘅鹿角球迷賽後更衝入球場向佢襲擊。
6日後，日職聯決定停止佢執法日職聯賽事。裁判委員長松崎康弘解釋，球員已對佢失去信心，停止執法對雙方均有好處。家本政明坦言承受極大壓力，佢停止執法日聯期間，繼續為亞洲足協及日本衞星聯賽執法，表現得到認同，日本足總決定6月15日開始，佢可以恢復執法日聯，球迷好快又可同佢見面。
球證都係血肉之軀，家本政明從未涉及黑哨，執法時亦專心，只係脾氣較為火爆，成日拔牌，易同球員發生衝突，但無論如何，佢都係一個富娛樂性嘅好球證，今次重返日職聯，未知有否請教過香港兩位師傅？
作者簡介：2001年開始擔任足球賽事自由撰稿人，曾親身採訪各項大賽，包括世界盃、亞洲盃及非洲國家盃等。現為香港賽馬會足智彩網頁撰寫球評分析。