早排被控非禮的士司機罪成，判180小時社會服務令嘅「白花油王子」顏福偉，近排好似低調咗，只係早兩日上過電台接受訪問，講嘅都係緬甸賑災。當日佢喺節目度講，接受傳媒訪問要先經公司批准，因為公司唔希望佢喺娛樂版見報，不過同慈善有關嘅就冇問題。
咁講公司事務當然亦都冇問題，顏生喺判罪前，自願辭去白花油（239）行政總裁一職，但仍然係執行董事，所以噚日公司開股東大會，佢喺幾位高層陪同下，現身見股東同傳媒，仲話「梗係日日都返公司，我係受薪㗎。」
小股東掛住攞禮物
華華問佢幾時要開始執行社會服務令，佢話，噚日個場合只講公司嘢，私人嘢唔想再提咁話。華華亦無謂強人所難。佢冇做行政總裁之後，就由其姪做署理行政總裁，直至另行通知。顏福偉話，佢哋暫時唔會搵人接手呢個位。言下之意，係咪等王子遲啲自己坐番呢？
股東會之後仲有段小插曲，話說一班股東唔似華華咁，關心顏生幾時執行社會服務令，只係一散會就問職員，「份禮物呢？」乜嘢禮物，據聞係兩支白花油加一個白花油公仔，話晒香港名牌，好嘢梗要攞埋先走。