氣氛好，始終真係對股市着數好多。以往股海大牛市期間，個別中資股只要露些少口風有意回歸A股市場，即使仲未有時間表，股價已可炒個不亦樂乎，淨係炒折讓都「夠照」。
目前股海氣氛係點，毋須星俠細表，自從去年港股見頂，內地股市又遭宏調打殘後，國企股即使回歸內地發A股，表現都係「向下炒」居多，H股亦受A股差勁表現所拖累，從此失去炒折讓光環。
A股難爭取高定價
發行A股要待中證監批，時間上無法一蹴而就，好似四川成渝高速（107）計劃發A股去年已有風聞，但講得嚟，搞都有排搞，𠵱家又要等批，到真正上場時股海隨時兩個世界。
去年10月成渝高速已同意有條件收購四川成樂高速，代價10.98億元人民幣，不過呢單注資要以A股得以上市為準，咁就有隱憂。現時氣氛麻麻，成渝高速發A股，睇怕都幾難爭取到較高定價，況且「政策市」之下，萬一股市突然太波動而令當局暫緩一切發行A股申請以穩定市場，成渝高速隨時「雙失」。既有憧憬，又具一定風險變數，在目前市況採取觀望態度較上算。