啱啱公佈結婚喜訊嘅陳慧琳（Kelly）噚日喺尖沙嘴出席美心月餅活動，Kelly喺台上話自己揀男朋友好似揀月餅一樣，個心同把口都要夠甜，仲要夠真心，又要有情趣同埋唔悶（咪即係多口味囉），直情就係講緊未婚夫劉建浩（Alex），所以一身廚師打扮嘅佢一直笑到合唔埋口。
心急睇婚紗草圖
有雜誌大大隻字寫，話Kelly要收成一億禮金先嫁，Kelly噚日就話根本大家仲未傾到，佢話禮金多少都唔係問題，最緊要就係搞掂件婚紗先，雖則𠵱家有幾個大牌子想贊助佢，不過佢就連一幅草圖都未睇過，所以佢都好心急吓。
嫁女餅人人有份
除咗婚紗有贊助，Kelly結婚就連喜餅同首飾都有贊助商拍心口搞掂，佢仲話唔止去飲嘅賓客，就連唔打算請嘅所有圈中朋友同傳媒好友都人人有份食嫁女餅。呢個準新娘仲話擺酒當晚已經準備好一間有無敵海景嘅ballroom，用嚟招呼馮仁昭同一眾行家，噚日佢仲問大家想食中菜定自助餐，認真客氣。