被稱為中國第一慈善家嘅余彭年，上個月打鑼打鼓咁招標出售包括李小龍舊居在內5塊九龍塘地皮嚟救災，噚日截標後，負責招標嘅置業國際，其主席蔡涯棉只係好簡單咁交代，話反應理想，余先生正詳細研究，結果將會喺下個禮拜三公佈，但就完全冇交代究竟收到幾多份標書及李小龍舊居有冇人吼。
華華即刻打去深圳，想搵余老先生問吓佢嘅意向係點，但負責接電話嗰位小姐，聽到香港報館搵，就好禮貌咁話余老先生因為最近身體不適，𠵱家休養緊。華華惟有問候兩句，並祝佢老人家身體健康。
據聞入標者唔多
之前已經去信同email畀政府，要求保留偶像舊居嘅香港李小龍會會長黃耀強講，下星期會再去追問政府意向點樣。佢哋同時都有嘗試搵余生，不過一直都搵唔到佢。
其實行動都得到好多人支持，好似田北辰、文雋同陶傑等，田二少仲話會聯絡局長傾偈㖭，真係好希望可以留到間屋做紀念館。
講番招標，雖然唔知有幾多份標書，但聽聞有都唔會多，特別係金巴倫道41號李小龍舊居，相信有啲人費事將來煩，所以心諗入都無謂。至於其他4塊地，分別係根德道3至7號、金巴倫道21至23號、羅福道9號同窩打老道131號。
mailto:[email protected]