身為模特兒的JaniceMan（文詠珊）一向注重外貌和儀態，但為拍攝電影《內衣少女》，她不惜上演一幕街頭「少女解扣」，當街伸手入胸口脫掉胸圍繼而怒掟洩憤。弱質纖纖的她更手持大鐵鎚，一臉悲憤地打碎負心情人的汽車擋風玻璃，盡顯外柔內剛一面。
𡃁界女神JaniceMan日前在太子道拍攝電影《內衣少女》外景，劇情指她偏愛成熟男士，但愛上陳輝虹最終卻慘遭拋棄，心有不甘的她手持鐵鎚，怒碎負心漢的座駕擋風玻璃，並當街將陳輝虹送給她作定情信物的粉紅色胸圍脫下，掟還給他。
碎玻璃彈上身
為求效果逼真，電影公司採用強化玻璃而棄用糖膠玻璃，Janice起初試用12磅真鐵鎚，但因太重而力有不逮，最後雖改用假鎚，不過經她用盡全力揮鎚，現場玻璃碎片四濺，也有些反彈到她的手及身上，幸好沒有受傷。
事後Janice頻呼好驚，她說：「其實打爆玻璃我唔驚㗎！反而最怕爆嗰下聲，因為我怕大聲，連爆氣球嘅聲都驚，不過都做咗準備戴咗耳塞，其他嘢就要靠自己去克服。」
早前Janice因發表「地震是上天給予的懲罰」言論，遭網民選為最乞人憎女星之一，票數僅次於鍾欣桐及Freeze，對此Janice坦言心情難過，她說：「唔開心一定有，之前講說話表達唔好的確係我自己問題，我已經時刻反省，有人批評唔係唔好，可以畀我知道有乜嘢做得唔啱，有錯就要改，以後要少說話多做事，專心做好自己本份，希望有一日大家睇到我嘅真心同誠意。」
該片導演陳慶嘉大讚Janice演出用心，不過說話太多懶音，他說：「可能時下年輕人講嘢都係咁，或者有懶音先貼近潮流，冇辦法，都要接受，JJ（賈曉晨）仲多，不過佢哋係我近嚟遇到比較擺心機去拍戲嘅新人。」
母被起底嚇親
此外，JaniceMan昨日在銅鑼灣惠康出席史諾比腕錶活動，其母日前被起底，又指她媽媽的美容院有收費過高之嫌，JaniceMan說：「媽咪好唔開心，佢唔係屬於呢行嘅人，俾雜誌騷擾咗成個禮拜，佢都唔適應影相，都受驚，我就開心因為屋企人都體諒我，冇怪我。」她表示不會因此搬屋，更慶幸公開與男友的關係後，男fans也沒有因此流失。提到近期大量𡃁模以她為假想敵，她就說：「唔同人有唔同市場，我勝在夠勤力，外表呢就可以用化妝彌補不足。」
採訪：魯萍、顏英儀 攝影：黃偉雄
