錢嘉樂、陳鍵鋒同蘇玉華噚日喺將軍澳電視城為無綫新劇《王老虎搶親》試造型同埋開鏡拜神，錢嘉樂以一身武松嘅裝扮示人，而鍵鋒喺劇入面就會有四個美女嘅造型，但係好多人見過女裝版嘅鍵鋒都話好似嘉樂嘅前度女友李珊珊喎。
身材一樣豐滿
問嘉樂覺唔覺得鍵鋒似李珊珊啫？嘉樂話：「我都係睇報紙見過佢（鍵鋒）嘅女裝扮相，真人仲未見到，佢趁我去咗馬來西亞就搞埋晒啲咁嘅嘢。」問佢覺得邊個（鍵鋒同珊珊）靚女啲？佢話：「假女人點可以同真女人比呀，不過如果以男仔嚟講鍵鋒扮女人都算幾靚，如果我扮就一定好核突。」記者再三追問佢覺得鍵鋒似唔似李珊珊？嘉樂就話：「佢戴埋頂帽個高度就似。」
聽講嘉樂喺劇入面同女版鍵鋒會有場親熱戲，問佢會唔會當正鍵鋒係李珊珊咁一樣咁投入，同埋會勾起佢嘅回憶？嘉樂仔顯得不知所措，開始語無倫次咁話：「嘩！咁好天不如去曬太陽啦。」之後佢話：「點會呀，我哋拍劇好專業，唔使嘅。」而蘇玉華就覺得女裝版鍵鋒個樣唔似李珊珊，不過身材就同珊珊一樣咁豐滿。
