我求大俠不嬲都好眼紅拿姆呢位仁兄，主要因為佢有一個好索嘅女朋友之外，佢真係成日死好命。前日對住土耳其，拿姆失晒魂唔知做乜咁，狂俾對手爆開失波，爭啲成為球隊輸波罪人。不過，佢喺補時階段為德國射入3:2嘅入球，做咗全國嘅「LastMinuteHero」，仲救番教練路維，拿姆要由狗熊變英雄？佢話1分鐘就夠啦！
被土軍沙里奧古玩弄
拿姆其實喺成場波都踢得非常之差，上半場有一次以為同咸美艾天托普仲踢緊拜仁咁，一個唔該將個波兜口兜面咁交咗畀佢，真係曳到離晒罩，已經出現咗瀨嘢嘅先兆。
到咗臨完場4分鐘，拿姆瀨嘢嘅時間終於都到。土耳其嘅沙里奧古喺右邊左扣右扣，本身啲假腳真係名副其實嘅假腳，點知拿姆成個人俾佢fake過，仲俾對手出咗球急勁嘅地波畀辛杜克近門篤入扳平2:2，呢鋪拿姆真係孭硬鑊。
不過，到咗補時嗰陣，拿姆明白咩叫博一博唔使咁頻撲，上到前場同希斯佩加打個onetwo，射番羅士圖列巴近柱，真係1分鐘之內變英雄。
帶挈隊友每人擸百萬
雖然拿姆做咗球隊嘅「LastMinuteHero」，令到教練路維不知幾興奮，不過呢位今場賽事嘅最佳球員都知道自己好唔掂，所以賽後都覺得唔好意思。
如果我係拿姆啲隊友好似「小豬」舒韋恩史廸加咁，俾呢個友仔拎咗個最佳球員獎一定唔多順，但話時話，就係拿姆呢一腳為隊友每人至少帶嚟15萬歐元（約155萬港元）嘅獎金，係德國隊史上最高嘅紀錄，如果拎埋冠軍仲可以拎到25萬歐元㖭，所以睇錢份上，德國隊成員原諒拿姆嘅犯錯啦！