好多格鬥迷期待萬分嘅《SuperStreetFighterIITurboHDRemix》終於推出！重製畫面，配上重新編排音樂，配合1080p高清畫質，將影音提高到最高層次，讓格鬥迷再次享受到招招到肉嘅快感！要留意係此作將會隨着《WolfoftheBattlefield:Commando3》一同推出，正式版預計於今年稍後在XBOXLIVEArcade中面世。
記者：許福合
二人連線隔空對打
講明係HDRemix，畫面自然係HD高清級，所以硬件方面亦要配合，最理想梗係有HDMI輸出XB360，再配個高清電視來打效果就最正，話晒都係1080p畫質！雖然講係重製，其實好多地方都有改變，如格鬥系統經過微調，整體平衡更好，屈機情況比較少；而且HD版支援寬螢幕，左右變相有更多空間，從閃避到攻擊戰略都有更大彈性。不過最令人期待都係可透過LIVE連線對打，安坐家中就可以與朋友動手動腳隻揪，亦可挑戰世界級高手！遊戲亦會加排名表，詳細統計玩家戰績。
平衡實力無得屈
以往格鬥遊戲總會有角色予人超屈機感覺，配合出招同位置，屈死經常遇到，重製版其中一個主要目標就係將角色間實力更平衡，打起來更為公平。據知廠方以往覺得最強有春麗、司令等，HD版先將最弱角色如Cammy、FeiLong、T.Hawk、Zangief和Blanka提升實力，中層亦有加強，令到整體實力差距較為接近，讓玩家憑技術亦可以弱勝強！另外舊版曾出現過Bug，如阿Ken不能翻身之後立即出Super、角色動作不暢順等，今次都已經得到修正。
三掣變二掣易操控
筆者最愛用阿Ken，雖然他並非最強，但玩落更有挑戰性。HD版中，阿Ken操控變得更容易了，旋風腿可以踢得更快更遠，命中距離更大；即使Miss之後，停留在空中時間也縮短，更快落地可更快組織攻勢。不過膝撞變弱了，扣血亦明顯比以前少，還好昇龍拳出招時間更寬鬆，即係代表更容易使出，作為連招就更好用。而要同時按三個掣的招數，會改成兩個即可，如輕拳輕腳就可使出；另外最好用的「連續技」狂㩒，亦減少了按鍵次數，再加上大量微調，整體更輕鬆同流暢。順便一提，遊戲會附有原始模式，讓玩家以原有設定回味遊戲。
主機：XB360
開發：Capcom
類型：格鬥
人數：1-2人/2人（LIVE）
官方網站： http://www.streetfighter.com/flash/