想啲音效勁啲、畫面靚啲，AV高清擴音機真係好有用，利用HDMI端子接駁播放器，可以睇到高清影碟；駁埋家庭電子遊戲機用嚟打機，高清畫質固然靚到飛起，再配合5.1環迴音效，令玩家有置身其中嘅感覺。再落啲本，駁埋投影機，喺80吋大畫面打機好鬼震撼。
前日小藍去咗金鐘XBOX嘅辦公室率先試玩佢哋開發咗三年、啱啱推出嘅首隻機動戰士高達遊戲《MOBILESUITGUNDAM-OPERATION:TROY》（機動戰士：特洛伊行動）。小藍化身為地球聯邦軍出戰，駕駛戰機士向敵人狂轟，1080p高清畫面真係好正，加上啲炮彈從四方八面射埋嚟，充份發揮5.1聲道嘅效果。
好似XBOX高級市場經理Anna咁，都幾靚女㗎，但唔好以為佢姐手姐腳，玩起上嚟都幾兇狠，向敵人連珠發炮，可惜例必虛發。佢話，呢個新遊戲最大賣點，係透過網上對戰平台XBOXLIVE，最多可同時跟10人透過耳機進行即時通訊同對戰。參戰隊伍分地球聯邦軍同自護軍兩隊，對戰模式分三款，分別以限時方式向對方展開攻擊嘅Assault；以最快攻霸佔對方據點的Conquest；以及獨自戰鬥嘅Survival。