六月十八日參加完港交所喺萬豪酒店舉行嘅八周年紀念酒會，碰到一位黃金貿易界人士，佢大吐苦水，話政府厚此薄彼，推動港交所搞期金交易，但對金銀貿易場嘅長遠歷史及過往對香港黃金市場嘅貢獻，好似視若無睹，愛理不理，佢又話以前財經事務及庫務局局長馬時亨好理解情況，與業內人士有偈傾，起碼佢哋知道政府嘅政策方向，能有準備。言下之意，佢對馬局長不勝懷念。咦，係噃，好似唔見馬局長在場嘅？原來有傳聞話佢為咗漢普頓酒店一事，要與區璟智瞭解情況，酒會賓客幾乎走得八八九九之後，馬局長先至趕到，同周文耀總裁傾密偈，周總裁話佢以前在新鴻基證券之時，對黃金交易好熟悉，睇嚟今年稍後港交所推出期金產品，事在必行。反而曾俊華司長一味講石油期貨，夏佳理與周文耀都好似「聽到一半」！好難怪嘅，香港炒家有幾多人對石油有真正認識呀，為炒而炒，瓜多過菜，易成歐美中東大鱷嘅點心。炒油同炒金係兩回事，港交所搞期金而唔願搞期油，十分務實。但曾司長點解對期油咁有興趣，我哋唔多明白，或者曾司長以為有期油產品嘅話，香港更易吸引伊斯蘭資金啦。
由萬豪酒店宴會廳行幾步就走到中餐廳「萬豪」，與基金經理及大賓架吃晚飯。整碟頭盤燒肉拼叉燒食下先，一入口，當堂皺眉頭，食慣鏞記飯盒（叉燒飯）啫，唯有嘆息三聲，在大酒店叫燒味，係自己嘅錯。好彩後來食番一條清蒸東星班，十分有水準，大家都冇咁冇癮。
大賓架就嘆息佢在投資銀行辛苦積累嘅認股權好容易化為烏有，對已經被炒嘅CEO不勝憤怒。咁又係，一年可以虧損一二百億美元，令股價大跌嘅CEO，夥計點會唔嬲吖。基金Ｆ就話：「對自己公司股票，唔好咁忠心，唔好鍾情。我每年得到嘅紅股（花紅一部份），一定在禁售期完即刻拋售，正因為咁，我間銀行股價雖然大跌，我嘅損失好少。」再問基金Ｌ點睇後市，基金Ｌ殊不睇好，佢認為creditcrunch（信貸緊縮）尚未結束，通脹為虐，股市仲會努力尋底。