「風神」來勢洶洶，雖然掛起8號波，好彩冇造成大混亂或重大損失，不過「風神」掠過香港之際，卻引起立法會一個小風波，差啲考起主席范太。
噚日星期三立法會舉行例會，范太冒住風雨朝早九點就返到立法會，昅實最新風暴消息，決定如果早上11點仍未落8號波，噚日就取消所有會議，否則押後至下午兩點半開會。點知通知議員上述決定後，天文台喺11點15分左右落波。既然天氣好轉，范太轉軚召議員下午如常開會。
下晝開會時，吳靄儀忽然提出，根據主席決定，會議已經取消，佢擔心忽然開會，噚日通過嘅法例可能無效，日後被人司法覆核，造成執法困難後果難料，要求法律顧問澄清會議是否合法。
主席可隨時召集會議
呢個時候，李柱銘主動「投案」，話係佢建議范太收回成命，因為仲有好多草案需要喺7月休會前通過，既然已經落波，就唔好嘥時間；內會主席劉健儀都話，按規則主席可隨時召集會議，所以噚日下晝開會冇問題。兩人費一輪唇舌解釋，風波戛然平息，范太冇被捲入風眼。