林嘉華早年移民多倫多，近年回流香港工作，與太太劉寶珍及19歲兒子林政鋒分隔兩地，不過劉寶珍每到暑假都帶兒子返港與丈夫敍天倫。日前林嘉華一家三口行街購物，劉寶珍與兒子為嘉華揀衫，林嘉華又隔空咀老婆，一家三口大晒溫馨。
剛播完的《師奶股神》中，林嘉華飾演的奸角最終入獄收場，不過現實中他則是好爸爸和好老公。日前他與太太劉寶珍及19歲獨子林政鋒在圓方商場行街購物，孭着背囊的嘉華，與兒子政鋒同穿黑色T恤，兒子更戴上headband，一副潮人模樣。劉寶珍挽着林嘉華四處逛，政鋒就待在父母左右，三人全程有講有笑，幸福滿瀉。
「買到一袋二袋」
其間嘉華一家三口踩入H&M男裝部，嘉華示意要買西褲，於是太太和兒子便為他挑選，但嘉華試穿後似乎不太合心水，最後只買了一件T恤。離開後，嘉華又忽然對之前試的兩條西褲心思思，於是折返H&M把西褲買下，購物完畢，嘉華一家三口乘扶手電梯往搭的士離開，此時嘉華竟忽然嘟嘴隔空錫老婆，狀甚搞笑，身後途人也看得眼甘甘。
記者日前致電嘉華，談到當日太太及兒子陪他買衫時，他說：「太太同個仔都有買，個個買到一袋二袋，星期日familyday，有時間咪陪吓屋企人囉。」
否認華仔樣樣管
談到早前有報道指嘉華與劉德華在澳門拍攝劉偉強執導的新片期間，華仔不但上至鏡頭下至服裝也要插手，更教嘉華這位前輩做戲，但他否認說：「千祈唔好以眼做耳，眼看未為真，我哋合作得好開心，每一場戲大家都坐埋一齊去傾去度，完全唔係報道講嗰回事。」
採訪、攝影：娛樂突發組