香港米業大王、金源米業（677）主席林烱燦呢個月12號病逝，業界一直關心主席個位由邊個接棒，會係細佬林烱偉？定係阿仔林世豪？金源米業噚日出通告，由執行董事兼董事總經理林烱偉頂上。
現年63歲嘅林烱偉未必人人識，但提到佢位靚太，相信好多人都知，就係前亞洲小姐樂蓓，兩人結婚多年，早兩年先生咗個囡囡。林烱偉早喺70年就加入家族生意幫阿哥手，喺財務管理同投資策劃方面經驗豐富，由佢做主席亦好合理。
做咗主席，每年酬金約470萬銀，不過對林烱偉嚟講可能志不在錢，而係守住呢盤家族生意，因為佢太太都好識買樓投資，睇番資料，樂蓓舊年2月曾將5年前買入嘅淺水灣明慧園單位，以2160萬銀賣咗，賬面賺成1062萬銀。