嗚嗚嗚，荷蘭輸咗嘞，荷蘭竟然輸咗畀俄羅斯，令左丁山在星期日早上吃不下早餐，只係食番自己對荷蘭嘅樂觀言論就夠晒飽。中文「食言」係指不守承諾，講過唔算；英文eatyourwords意思有啲唔同，係指講錯晒，承認番。左丁山睇完三場荷蘭分組賽，擊節讚賞，認為可奪今屆歐洲國家盃，不止得個講字，仲打電話到1885，實質支持。嗚嗚嗚，荷蘭對俄羅斯，呢鋪輸得好心痛，荷包更痛，以後唔敢咁武斷嘞。
神奇教練荷蘭人希廸克果真神奇，以前執教荷蘭成績好，因荷蘭有唔少球星，成績好似乎理所當然，但希廸克教南韓、澳洲、俄羅斯呢類公認世界二級球隊，居然可以帶領韓、澳、俄挑戰勁旅，我哋冇法子唔佩服到五體投地。中國足球咁鬼差，不如搵啲中國大富豪（好似阿巴莫域治之類）捐款出天價挖希廸克做中國足球教練，以進軍二○一四年世界盃為目標。如果希廸克都搞唔掂中國隊，就證明中國足球員係朽木。
雲巴斯頓今次面對昔日上司，在戰術上完全輸晒，畀老上司睇死咗。俄羅斯放棄中場，屯重兵於中路打陣地戰，令荷蘭冇空間打快速反擊，亦無法滲入禁區施射，進攻上，俄軍以其人之道還治其人之身，打快速突擊，左翼阿斯維速度高，腳法好，頭腦冷靜，傳中波威脅大，此人傳中一腳似碧咸，盤射似Ｃ朗，速度似禾確特，頭腦似費比加斯，論臨場表現勝於任何一位荷蘭球員。踢完上半場，左丁山已經行唔安，坐唔落，下半場一開始，雲巴斯頓換人，出雲佩斯換古積特，收埋洛賓唔出，實在冇道理。反觀俄隊教練希廸克，遲遲先至換人，結果到咗加時時份，俄羅斯球員仍然可以高速推進，荷蘭人就舉步維艱，卒之捱唔到完場射十二碼。賽後希廸克話俄羅斯在戰術上、體力上、技術上完全壓倒荷蘭，雲巴斯頓亦話輸得心服口服。荷蘭球迷大表失望之餘冇痛罵希廸克係荷奸，果真係文明球迷也。
俄羅斯在四強準決賽面對西班牙，雖然在分組賽曾大敗一比四，但俄隊短期內如脫胎換骨，再遇西班牙，邊個敢話佢會輸波。西班牙對意大利，全場進攻，但冇法子撕破穩守突擊專家意大利嘅血肉長城，只靠射十二碼贏波，以此狀態，對住手下敗將俄羅斯，未敢言勝。