歐國盃進入4強階段，對球員私生活採放任態度的意大利、荷蘭紛紛下馬，相反講求紀律的德國，在8強戰後放球員兩天假，但周日歸隊就要與妻子女友「隔離」；到底應該「開放」還是「禁慾」，《拉闊足球場》多位「性情中人」同大家分享睇法。
Alan：波歷克禁色要讚
我睇波時發覺，荷蘭的太太團通常有入場睇波，我就覺得球員賽前一晚唔生性，做咗啲「額外運動」，唔多唔少都搞到腳仔軟。相反德國隊長波歷克，身體力行唔准太太入營，成隊波好似生性咗，所以我今屆撐硬德國。
決賽組合我睇好德國對西班牙；呢班俄羅斯，球員打到120分鐘都咁好氣，懷疑佢哋食咗藥，但就唔信佢哋keep到；西班牙目前順風順水，唯一擔心遇逆境波，隨時好似葡萄牙咁即刻出局。
今集心水：星期三1德國勝土耳其2:1（8倍）、星期四1西班牙勝俄羅斯2:1（8倍）
Victor：老虎乸管住係定啲
我一定贊成老婆喺身邊，舒展吓身心，我指有人陪傾偈，唔好諗第二樣嘢；始終運動員有啲野性，有時一大班球員起哄，你壞就有人跟你壞，所以有老婆管住，點都要扮乖；乖就會修心，修心就谷埋踢一場好波。
我做游泳教練好多年，帶隊出國比賽，發覺法國隊比較開放，開賽前3小時都准泳手出場館外玩樂，唔知係唔係法國足球隊都冇咩紀律，本身已經傷病老弱殘，仲要額外付出體力，唔出局就假。
今集心水：星期三1德國和（3.7倍）、星期四1西班牙勝（2倍）
AsianIronman：賽前「熱身」有助減壓
我覺得有老婆喺身邊，對紀律有好處，起碼球員都唔敢蒲吧，乖乖咁喺酒店瞓覺；男女在賽前做「熱身運動」，我覺得在運動學嚟講，有紓緩壓力作用。
講番邊個球員最失望，我就覺得非東尼莫屬；呢位意大利中鋒，應入唔入，錯失好多入波良機，我覺得意大利出局佢好大責任。俄羅斯前鋒艾沙維就最有驚喜，佢只不過踢辛尼特，大家都估唔到佢有幾好，點知速度同射門都咁厲害。
今集心水：星期三1德國和（3.7倍）、
星期四1西班牙勝（2倍）
加料炮製
歐國盃期間，逢周一及周四或周五都可以網上收睇《拉闊足球場》，本節目估波遊戲第2階段於17/06起接受登記。我們將提供$300供讀者從「冠軍」及「神射手」兩項中自由投注（最多兩注），參賽名額有限，先到先得，快啲登記啦！
《拉闊足球場》下次舉行日期：27/06
想參加？即上
http://soccer.atnextcom/jp/soccer
節目重溫：
http://sport.appledaily.com