憑日劇《大和撫子》主題曲《Everything》走紅嘅日本巨肺女歌手MISIA，今年出道10周年。一向行事低調嘅佢，噚日喺官方網頁內宣佈8月開始會舉行首次亞洲巡迴演唱會，地點包括台灣、新加坡、上海、首爾同香港。首站會喺8月30日喺台北舉行，之後再唱到新加坡、上海同首爾，10月就會移師到香港開騷，預計五個城市演唱會可吸引七萬人捧場。