北京直擊　MOTO×Kodak　六月照相館

北京直擊　MOTO×Kodak　六月照相館

六月份的北京，細雨，原意想帶住呢部剛發佈嘅MOTO新機ZN5，去鳥巢以及用LED燈組成嘅水立方兩大奧運場館，拍攝一輯實地靚寫真。念頭因天雨打消了，但估唔到MOTO早有準備，喺場地內，四邊牆身掛滿ZN5嘅攝影作品，主題來自八個城市，由八位攝影師操刀，年紀輕輕已經將手機影相功能發揮得淋漓盡致。此刻，唔講仲以為我嚟咗照相館。

記者、攝影：陳國輝

即睇！
ZN5拍藝術照

題材為「世界一天，靈感源自紅色」，利用色彩特效，屬北京人作品。

a.勁藍嘅天空，當然唔會係香港啦，呢幅作品由孟買攝影師操刀。

b.該莫斯科攝影師利用手機單色Tune，凸顯出咁經典嘅建築藝術。

c.真正嘅Snapshot原來係呢幅，聖保羅攝影師於門外拍攝，最自然。

d.呢幅相考驗到鏡頭對光線嘅敏感程度，紅色字冇化開，又幾靚喎！

e.現場有百多位傳媒到訪，在黑白雙色的展館內舉行發佈會。

f.MOTO（左）與Kodak（右）兩高層十足老友鬼鬼，即場玩自拍。

g.機背似足一部獨立的相機，反轉先似番部手機。

震拍300萬像全景

用家最關心，必然係MOTO與Kodak聯手嘅威力，ZN5配備500萬像素鏡頭以及Xenon閃光燈，相機面仲印有大大隻「Kodak」Logo，加埋12mm機身咁薄，仲唔型死！但更多人想知，其實佢有冇沿用Schneider德國鏡頭？據講，今次雖然冇同Schneider合作，但選用經驗更豐富嘅CarlZeiss，由佢親自操刀！拍攝效果叫人驚喜，自動對焦，連拍幾幅都唔使一秒搞掂。ZN5仲注入全景模式，當手機震動嗰刻，將鏡頭由左至右移動即可完成，快捷簡單，解像度仲高達300萬，適合冲曬，比傳統所謂嘅「全景」似乎更實際好用。

h.利用連拍功能可捕捉到拋波嘅動作。

i.半透明介面，夠精簡，至於靚唔靚就見仁見智。

j.影相時有俗稱「魔換技術」嘅Shortcut，即睇相簿。

極速過Kodak相簿

呢期人人興玩Blog，再唔係就鍾意將啲相Upload上網，公諸同好。ZN5亦特設類似功能，呢項叫做「KodakGalleryLink」嘅分唇，可以俾用家影完相之後，透過手機EDGE或Wi-Fi上網，然後直接掟去Kodak相簿，慳番慢慢輸入Path嘅時間；但如果你獨食啲，淨係留畀自己睇，亦可Send去裝有藍芽設備嘅Notebook、Laptop或者電子相架；再盡啲，甚至可用TV-Out輸出至大型LCD芒或者Plasma㖭，真係幾種玩法任君揀選！

■現場提供免費曬相服務，當然要用ZN5先得啦！

■呢項屬Kodak獨門技，首次加落手機。

■靚相唔一定要冲曬，講求環保亦可抄落電子相架欣賞。

■並非主打功能嘅音樂播放，表現唔錯。

DetailsCheck！

k.機身尾端用防跣手物料做成，可放心單手拎住影Snapshot都冇問題。

l.咁突出嘅紫色按鍵係相機快捷掣，不過記住要開埋鏡頭蓋先拍喎！

m.跟機採用BX50鋰電池，通話及備用時間高達574分鐘及579小時。

n.配備3.5mmAV插口，隨時可用耳筒收聽FM廣播或者MP3歌曲。

試相區

連接效果唔錯，一來接駁位、色彩差異唔明顯，其次係解像度可高達3,119×917，接近300萬像素，真正曬得出靚相！

室內有黃燈影響咗色溫，但實際拍出來嘅效果，已經自動Tune過，而且有可能因光度不足，Noise頗嚴重。

Profile

制式：GSM四頻
體積：118×50.5×12mm
重量：114g
通話時間：349-574分鐘
備用時間：310-579小時
主要功能：500萬像素相機、Xenon閃光燈、自動對焦、全景模式、ModeShift魔換技術、KodakGalleryLink、Wi-Fi、EDGE、TVOut
查詢：MOTOROLA（25063888）

■ZN5包裝盒上印滿Snapshot照片。