「你可以選擇賣畀我哋，我哋會永遠放佢喺紐約大都會博物館畀其他人欣賞；相反，你都可以賣畀其他色情商店嘅老闆，佢哋會想辦法令到畫入面女主角胸部睇嚟大啲，之後將幅畫掛喺窗口，吸引啲男人冒雨嚟買。」以上嘅說話係出自股神畢菲特，至於佢講緊嘅並唔係乜嘢人體藝術品，而係佢嘅「獵物」──想收購嘅公司。
據彭博報道，畢菲特2月中喺多倫多，毫不吝嗇咁回答咗300位行政人員嘅問題，其中一位出席嘅人好直接咁問佢，「點樣可以令其他公司接受你嘅收購建議，賣咗間公司畀你。」以上就係股神嘅答案，學到幾多，就要睇你嘅悟性有幾高。
除咗識得欣賞藝術，原來講個信字都係股神收購其他公司嘅其中一道板斧。遠嘅唔提，就講06年佢用咗大嗱嗱40億美元，買以色列金屬製造廠Iscar八成股份，嗰家公司幾位話事人去咗美國三次同股神傾咗幾日，連盡職審查都未做過，股神就決定買，間公司嘅話事人仲話，扑槌之前畢菲特投資旗鑑──巴郡嘅人，連Iscar嘅工廠都未去過。
要做股神，除咗創意同口才，華華認為，勇氣都唔少得。