朱玲玲同顏福偉（右）噚日到港台接受訪問，講到為緬甸災民籌款嘅計劃，朱玲玲男友羅康瑞早前以28萬人民幣（約318,000港元），投得佢捐出嘅照片「蓮蓮生財」，更指擁有呢張相好幸福，朱玲玲笑笑口話：「可能佢係生意人，鍾意張相個名啦，今次緬甸賑災佢都有捐錢。」會唔會請羅康瑞食飯？佢話：「如果個個朋友捐錢我都要請食飯，咪好唔得閒？」顏福偉就透露公司唔准佢接受娛樂版記者訪問，日後出席活動只能夠同慈善有關，連到電台訪問都要公司批准。