能源價格大幅飆升，大陸發電廠成本上漲，雖則下個月起大陸加電費，但對電力企業嚟講，似乎幫唔到啲乜。成本高咗，加價又冇用，做老闆嘅下一步梗係向打工仔開刀。
據《成都商報》引述中國華電集團某子公司營銷處一位負責人話，幾日前公司出咗通知，話要減住房補貼金。大陸電企提供唔少補貼同獎金，減住房補貼金即變相減薪。嗰位負責人話06年喺電廠仲係一個小職員，月薪3000幾人仔，加埋補貼同加班費，一個月先至得4000幾蚊，家陣做咗副處長，一個月人工都只係得3000幾銀，即係衰過舊時。
報道又引述國電集團某分公司一名內部人士話，上個禮拜已有高層同佢哋講，集團蝕得好甘，所以員工要減薪，平均減三成。中國大唐四川分公司內部人士亦話，近年電煤價格係咁升，火力發電企業虧損嚴重，企業只能通過加大內部管理節約成本。
《中證網》報道就話，以大同礦區坑口煤炭嘅價格為例，將今個月20號嘅煤炭價格同年初相比，大升近五成。據《新華網》報道，國內五大發電企業今年首季度全部虧損，金額高達28億人仔，睇怕打工仔仍要繼續「瘦薪」。