新婚燕爾嘅李樂詩（Joyce）前晚帶埋老公阿Ted、同埋爸爸一齊入亞視錄影《樂壇風雲50年之JoyceLeeWeddingParty》節目，有份演出嘅嘉賓仲有劉雅麗、李國祥等，而戚黛黛同沈穎婷仲齊齊着住婚紗載歌載舞。李樂詩喺節目裏面都有着婚紗唱咗幾隻歌，佢話：「𠵱家俾人叫李太仲係有啲唔慣，同埋我返咗香港只有4日時間，心情未曾平復，仲有啲緊張，我哋8月會喺香港擺酒，𠵱家我一邊繼續做嘢，一邊享受婚姻生活，我哋暫時唔會生BB，因為想過吓二人世界。」
唔為生仔上床
Joyce個老公唔係圈中人，佢話：「阿Ted本身係姓黃，但係佢阿爺當年移居美國嘅時候，外國人誤將佢嘅名當係姓氏，咪以為佢姓李，不過我老公費事解釋咁多，咪由得啲人誤會囉！」
另外，李樂詩嘅好姊妹劉雅麗就好羨慕佢同陳慧琳嫁得出，劉雅麗話同男友拍拖將近10年，但係仲未打算結婚，劉雅麗仲話覺得當自己事業好啲，愛情就會唔好，若果愛情好就輪到事業唔好，佢話：「𠵱家我仲係同父母一齊住，結唔結婚係冇得迫嘅，冇得強求㗎，我唔會因為想生仔而同人上床做愛，況且結咗婚都可以離婚啫，就算𠵱家同男友分手都得㗎，要我孤獨一個都OK喎！我唔係啲小鳥依人嘅人，不過我個男友就覺得我好𡃁妹。」
