早幾日，喺沙地阿拉伯舉行嘅巨型石油大派對，卒之曲終人散。除咗燃燒好多飛機油之外，唯一「成果」就係沙地政府應承增加石油產量。加幾多？喺呢個每日用8600萬桶石油嘅世界，增加20萬桶。大家可以自己去計算個百分比。
以前孫柏文做石油股分析員時，曾經撰寫過一個研究報告，就係講喺世界上，特別喺啲OPEC油組國家裏面，究竟有幾多剩餘未使用嘅可生產量。幾年前要研究嘅原因，就係如果油價由當時40美元一桶，直線飆升。美帝政府為首嘅西方世界發爛，用盡卑劣手法去迫使油組國家增產，究竟即時可以增加幾多供應。
油國生產量已近頂
其實呢幾年嚟，油組每次話「會增產」，增加嘅只係油組畀每個成員國嘅生產配額。不過事實上，每個油組成員喺幾年前，已經冇理個配額。個個都有幾多可生產量，就生產幾多石油。除咗一個國家之外，完全冇剩餘可生產量。呢個國家就係沙地，所以如果任何一個非沙地嘅油組成員話「會增產」，基本上佢哋係喺到膠嗡着。
當時沙地嘅可生產量係每日1000萬桶石油，用咗90%。跟住增產到950萬桶石油，而石油大派對之後，就話會增產到每日970萬桶。剩番30萬桶士啤。雖然，沙地政府話去到出年年尾，佢哋能將可生產量推到每日1250萬桶石油。我絕對相信德州專做能源項目生意嘅投資銀行Simmons&Company，一路以來嘅講法，沙地政府又係膠嗡着。
增需求不如減消耗
講真，當地球上60億人，每日要搵方法去分配8600萬桶石油，你覺得現價高都只不過係以前太平。再講，特區人民平均每人耗油量，係大陸13億同胞嘅8倍。我哋特區耗油量，就係大約每日30幾萬桶。30幾萬桶即係幾多？中海油（883）嘅生產量，都係30幾萬桶一日。一個700萬人香港已經用晒中海油嘅產量，13億人又會點？
老土都要講句，想增加供應，減低需求消耗，「價太高問題」嘅最好解決方法，就係供應商落袋同消費者自己出錢面對嘅價格持續「太高」。特區減油稅，真係得孫柏文反對？
網誌： http://phatdat.blogspot.com