國寶級一級保護動物中華鱘不幸命喪香港，噩耗傳出後震驚市民，國寶被殺非同小可，特首煲呔噚日拍晒心口咁款，保證其餘四條中華鱘一定安全，然而市民未必放心，事關中華鱘今次係死喺以保育海洋生物為己任嘅海洋公園之中，海洋公園連一條海狼都管唔住，繼續將國寶交由佢哋飼養，叫市民點放心？
為盡快安撫民心，平息市民疑慮，八方建議煲呔即時運用特首權力，好似保良局接管乏人照顧兒童咁，接管四條國寶，必要時使出迫雞販日日清雞招數，以非常手段緊急立法，總之就要盡快取回中華鱘撫養權，正如政務司司長唐英年話，唔可以俾嗰幾條魚條條fing，流落海洋公園。
煲呔府魚池啱養國寶
對四條中華鱘而言，海洋公園係同類客死異鄉嘅傷心地，繼續留喺度可能會有心理陰影，所以要盡快為佢哋另覓新居。仲有邊度較海洋公園，更適合國寶棲身呢？就係煲呔官邸禮賓府，唔通又係梁顯利社區中心咩！煲呔府中有個大魚池，飼養多條名種錦鯉，呢個魚池方位絕佳，水質清純，又有專人日夜打理，確係中華鱘安居之所，更重要嘅係，煲呔本身係養魚專家，朝朝親手餵魚，日日同錦鯉傾偈，十分熟悉魚類習性，中華鱘由佢悉心飼養，八方好有信心國寶可以喺香港頤養天年，長命百歲。
煲呔志願係做好呢份工，養好呢幾條魚應該冇難度，八方只怕上有好者，下必甚焉，其他人有樣學樣，以為做特首就要養好呢條魚，玩開園藝嘅「疑似特首候選人」梁振英，隨時棄農而漁，唐唐、鬍鬚曾冇理由落後於人，屆時香港變身鱘魚港，中華鱘與白海豚遨遊維港，確係奇觀。
安頓好幾條國寶，煲呔應該嚴肅追究中華鱘「5號」死因，唔可以俾國寶枉死。中華鱘係一國之寶，由特首領導研究死因小組合乎規格，八方已經講過，煲呔係養魚專家，由佢親自調查死因，還市民事件真相，相信無人異議，同時要將調查報告上呈北京，若證實有人為錯誤疏忽照顧，一定要認真問責，否則中華鱘死得不明不白，特區如何向中央交代？
mailto:[email protected]