鄧麗欣（Stephy）昨日在西九龍拍攝電影《內衣少女》外景，她置身掛滿過百件胸圍、內褲及內衣的場景中，寓意每一件胸圍代表一個女人的故事。導演陳慶嘉昨日透露原想申請在西九龍海濱長廊區取景，但遭康文署引用遊樂場條例拒絕，指不可在長廊區晾曬衣服及令政府尷尬，他勞氣大罵有關部門歧視內衣。
首次置身一片bra海中，鄧麗欣形容場面壯觀震撼，她說：「好靚，有好多都係色彩繽紛嘅，以前未見過，可能接觸多咗，所以唔會有尷尬感覺，而且胸圍都係生活必需品，用係好正常，我𠵱家對bra嘅興趣多咗，想買唔同款式收藏。」
「佢話令政府尷尬」
昨日一場bra海場景，電影公司原先想申請在西九龍海濱長廊區取景，但遭康文署拒絕，導演陳慶嘉不滿地說：「借地方拍戲影視處好幫手，但申請喺西九拍呢場掛胸圍做佈景嘅戲就遇到麻煩，因為係向康文署申請，佢哋引用遊樂場條例，話唔可以晾曬衣服，又話唔可以做非法用途、令政府尷尬之類原因。拍戲都係一種藝術，咁係咪代表歧視內衣，但點解內衣廣告又可以隨街見到。冇辦法之下，我哋就租用只有一個鐵絲網之隔嘅地方去拍。」
此外，Stephy謂覺得到店舖買內衣褲太尷尬，故習慣在網上訂購，她說：「我身材、size係點大家一睇就知，唔會避忌，但香港啲舖頭太開揚，揀bra會俾人望到實，最驚係有男人企喺度等太太或者女朋友揀bra，呢種場面我遇過，真係好尷尬。」
「越性感越唔舒服」
Stephy又自揭穿內衣喜好，不諱言最愛性感款式，但敢買不敢穿，她說：「平時着黑白兩色多，因為colorful、喱士款着衫唔方便，雖然冇乜機會着，款式越性感越着得唔舒服，所以買嚟睇唔係買嚟着，我都收埋啲好性感嘅睡衣同內衣，女仔就係咁，擁有咗覺得自己有味道、有性格同越有女人味。」
採訪：魯萍
攝影：黃偉雄
