現年43歲的張衞健，與年輕9歲的女友張茜感情穩定，女方早前卻不幸小產，幸得張衞健一直從旁扶持，二人昨日公開承認已婚，張衞健表示早前已低調在內地結婚，雖然張茜經歷胎死腹中之痛，但她仍堅強面對，想到丈夫的貼心關懷，她昨日感動得哭起來，張衞健承諾會在教堂搞婚禮。
張衞健與張茜昨日在火炭錄賑災歌曲《四川不哭》，二人一齊接受訪問，張衞健對張茜十分細心體貼，而張茜已有一年沒有來港見傳媒，故表現較緊張。記者問到張衞健有關二人婚訊，張衞健大方承認說：「我哋結咗婚有一段日子，喺內地結嘅，未有BB時已經結咗，我唔做未婚爸爸，不過遲啲會喺教堂補行婚禮，但係未必喺香港做，或者今年會做到，其實張茜多次問我如果有記者問點答好，我次次都諗個好答案，今次江郎才盡，冇得諗不如講出嚟。」
內地註冊家人見證
張衞健又表示他們還未影婚紗相，至於日後會否再生育，他覺得現在要先回氣，二人的心情已平復。在張衞健錄音期間，張茜獨個兒接受訪問，當記者提問到張衞健十分緊張體貼她時，張茜即時喊出來，要工作人員遞上紙巾及帶她返回錄音室。其後二人再出來，張衞健說：「張茜知道傳媒關心佢，不過好似喺傷口度又再割番一刀咁痛。」
問到張衞健可打算再造人？他即說：「等佢同我都回一回氣先，心情平復就平復咗。」張衞健表示明日會與老婆張茜到外地旅行，可是蜜月之旅？他說：「蜜月之前去咗。」
99年拍劇擦出愛火
提到早前在內地註冊，張衞健指當時只邀請家人見證，他說：「當時冇朋友在場，因為我唔想出埋佢哋嘅機票，我遲啲會有正式嘅儀式，唔使擔心。」對於張茜激動的行為，他說：「佢係咁，好鍾意喊，又好鍾意笑。」張茜向記者大讚張衞健，他得戚的說：「我承認我係個好男人。」
現年43歲的張衞健，99年拍攝劇集《陳夢吉傳奇》與比他年輕9歲的女主角張茜擦出愛火花，兩人自公開戀情後，一直非常恩愛，張衞健不時公開盛讚女友，更多次傳出兩人已秘密結婚的傳聞，惟當事人否認。去年年中，張茜證實懷有張衞健骨肉，預產期為今年3月，可惜天意弄人，在農曆新年間張茜意外流產，兩人深受打擊。然而張衞健和張茜互相扶持，很快便收拾心情，攜手走出陰霾。
採訪：駱華齡
攝影：陳俊強
