背景神秘嘅陳振聰行蹤飄忽，以私人飛機為家，遙控秘書出面競投奧運火炬，以200萬元買到由國泰常務總裁史樂山捐出義賣嘅火炬，不過Tony陳冇親身接收火炬，由軍師朱偉民代勞。
朱偉民被指資助民主黨甘乃威參選而成新聞人物，不過佢噚日話佢老朋友、甘乃威助選團成員黎學廉已解釋得好清楚，所以佢冇乜嘢補充。佢又話陳振聰唔喺香港，𠵱家好似細路仔咁放暑假，同仔女、太太坐私人飛機四圍去，又話陳振聰早前以私人名義捐出過千萬元賑災，由於好低調，所以冇乜人知。
捐善款望重建校園
朱偉民噚日接收火炬前，讀出Tony陳聲明。陳振聰透過聲明稱，𠵱家係災後重建關鍵階段，佢用200萬元投得火炬，善款捐畀苗圃行動重建學校，希望學童有安全校舍。四川大地震後，有關方面喺小甜甜遺產中撥出3,000萬元賑災，陳振聰噚日特別表明，願意盡能力協助國家建設，未來會專注及盡心發展內地慈善工作。朱偉民話會將火炬暫時存放喺佢律師樓，稍後交回陳振聰，至於將來點處理，就要由物主決定。