賭王何鴻燊旗下嘅澳門博彩（880），噚日喺灣仔君悅酒店地下Ballroom搞機構投資者（芬佬）推介會，澳博係今個月嘅焦點新股，就算冇請記者去，都有大班記者企晒喺Ballroom門口等，睇吓班芬佬對澳博有乜意見。
正當華華等到發吽豆之際，赫然見到一位貌似謝賢/梁家輝嘅高大男士從Ballroom走出嚟，望真啲，原來係九倉（004）主席吳光正。佢戴住副明星啡眼鏡，襯件粉紅色恤衫，加件啡色外套，真係唔係平日喺股東會見嗰位吳光正嚟㗎。可惜華華當時手上冇相機，否則就可以將吳主席嘅型look同大家分享。
不過，最重要係，吳主席噚日心情勁靚，見到華華走上去問佢，係咪打算攞幾個億出嚟認購澳博新股，佢竟然冇cool到爆咁走咗去，仲停喺度同大家解釋，話自己只係食完飯，路過去洗手間，冇去到澳博嘅推介會。為表清白，佢仲舉起雙手話：「自己洗完手，對手仲濕嘅！」真係唔信都唔得啦。
華華之所以懷疑吳主席有意認購澳博新股，因為佢之前都係新股擁躉，舊年攞咗十幾億出嚟買SOHO中國（410）、阿里巴巴（1688）等幾隻新股。
董事局星光熠熠
嗱，吳主席就話係路過啫，但英國兒童基金TCI亞洲董事何志安就真係去咗推介會。TCI之前搞到領匯（823）一頭煙，何志安代表TCI坐喺領匯個董事局度，可見非尋常人物，不過佢噚日直行直過，唔似得吳光正咁親民。
不過咁，就算澳博冇明星級投資者，都有星光熠熠嘅董事局成員。4位獨立非執行董事，包括工商局前局長周德熙、民政事務局前局長藍鴻震同立法會議員石禮謙，位位都德高望重。藍鴻震噚日亦有畀面出席推介會㖭。
電郵：mailto:[email protected]