環保人士開始出動拉票,部署參選九西多時嘅田北辰,噚日又有新搞作,趁李小龍九龍塘故居放盤截標前夕,公開呼籲政府買起李小龍故居,改建為李小龍博物館。田二少越嚟越入戲,噚日忽然李小龍上身,喺銅像前扮李小龍。 佢同八方講,當年全靠有李小龍,自己喺外國至冇俾人話係「東亞病夫」,「啲外國人都唔敢隨便行埋身。」田二少讚李小龍唔只係電影明星,仲為中國人吐氣揚眉,為咗表達對呢位英雄致敬,佢早前去信商務及經濟發展局局長馬時亨,建議政府考慮收購李小龍故居,馬局長覆信稱,要同民政局、發展局等商討,即係冇咁快有下文。