今年初，被譽為全港「至索」上市公司主席嘅康健國際（8138）主席蔡加怡曾登上港聞頭條，原因係淫照風暴居然牽連埋佢，話說某本周刊一篇文章嘅內容，影射同誹謗蔡加怡係其中一位女主角。啋！畀着你都火滾，所以蔡主席就入稟高等法院告嗰本周刊，要佢哋道歉兼賠償。噚日佢出席公司一個活動，華華以為去問吓佢單官司搞成點，不過，唔知係咪股市波動，所以啲傳媒朋友淨係掛住問蔡主席啲投資情況。不過，據了解，單官司仲進行中。
官司仍在進行中
講番佢嘅投資，蔡加怡早喺18歲就買賣股票，呢排個市咁波動，但當被傳媒問到個人投資有冇損手時，蔡加怡竟然反問：「乜嘢係損手？」吓，唔通靚女就唔會輸錢，抑或有個玩具大王老竇，所以唔怕損手？
錯晒！原來做醫療體檢嘅蔡加怡，以為大家又係問佢有關公司嘅嘢，所以趕唔切反應。到記者再問一次，她就恍然一悟，答案係：「都冇乜損手。」佢仲話，近一年都冇乜點玩股票，雖則投資組合裏面嘅股票主要用嚟長揸，但都冇諗住趁跌市入貨，因為對個市冇信心，所以早早收手。
唔玩股票，咁蔡加怡呢輪忙啲乜？就係搞慈善基金，佢一口氣成立咗兩個基金，一個係以公司名義成立嘅「體檢慈善基金」，針對香港弱勢社群，為佢哋提供免費醫療同身體檢查服務。另一個「心連心行動慈善基金」係佢、曹貴子同曹貴宜等集團管理層牽頭成立，着重內地教育，噚日仲搵嚟中國女排一齊搞慈善。
兩個基金會都等緊政府發牌，已到最後審批階段，蔡加怡話，籌善款一定會搵屋企人，爹哋蔡志明未認頭話捐幾多，但相信做善事爹哋一定冇問題，家姐蔡加敏呢？佢話：「我會要佢支持。」
電郵：mailto:[email protected]