張衞健和張茜前晚錄賑災歌《四川不哭》，其間張衞健公開承認二人已在內地結婚，並暢談求婚過程。原來他求婚時沒有準備鑽戒，也沒有鮮花，只穿上一條穿洞的羊毛內褲，毫無浪漫氣氛，雖然如此，但已感動到張茜，求婚一次便成功。
張衞健和張茜前晚承認在有BB前，已一早在內地註冊結婚，當時雙方家長均在場。健仔大爆張茜10多歲開始，一直渴望在某年紀前結婚，於是他在張茜那年生日前求婚，達成她的願望。
買鑽戒再求婚
健仔回想當時的狀況時笑說：「嗰時我同佢喺香港嘅屋企，我着咗條羊毛長內褲，呢條褲係我幾年前去北京拍戲時買嘅，同張茜相識嘅時間差唔多，歷史好悠久，條褲仲穿咗個窿，我就咁跪低向佢求婚，手乜都冇拎住，冇戒指又冇花，當時張茜仲笑我，佢睇過好多電視劇，求婚場面係好浪漫，就係冇見過有男人着穿窿羊毛褲求婚。」
雖然健仔當時身無一物求婚，但張茜爽快地答應了他的求婚，這事讓他感到歉疚，健仔又說：「我唔希望自己嘅太太，戴住呢個求婚回憶度過餘生，於是之後都買咗隻戒指，我諗咗好耐，要搵一個浪漫地點，重新正式求一次婚。」
第二次求婚，距離第一次不足一個星期，且經過深思熟慮，健仔覺得在家裏求婚，若房子將來賣掉就沒有了回憶，餐廳又會倒閉，在公園又不想給別人「照田雞」（偷窺），最後他挑選了維多利亞港，且張茜說過，從來沒有跟健仔一起坐過小輪。
健仔說：「我本來打算同佢吹住海風，然後突然拎戒指求婚，點知冇諗到，喺我哋前面有幾個男女認出我哋，咁我又真係冇勇氣拎戒指當眾下跪，太唐突喇！」於是他牽着張茜的手，拿了件外套搭在互握的手上，並替她套上婚戒，不過張茜戴上戒指後，一直將手插在褲袋裏，她說：「我怕別人搶我的鑽戒，把我的手指給砍掉。」他們又謂二人性格率直，婚禮不用籌備太多，最後低調地在內地註冊。
撰文：葉雪