上個禮拜睇新聞，小甜甜爭產主角之一陳振聰以200萬銀投到支奧運祥雲火炬。有時呢個世界就係咁估佢唔到，一支炒價過百萬嘅祥雲火炬，有人爭崩頭，但作為中國體壇icon人物、中國人永遠嘅體操王子李寧，就唔稀罕呢支火炬，居然唔傳聖火。李寧（2331）首席財務官陳偉成同華華講，據佢所知，李寧唔做火炬傳遞手，係李生自己嘅決定，冇涉及商業考慮。
只因低調非商業考慮
陳偉成仲話，其實李生近年都越嚟越低調，最多都只係默默咁捐錢支持內地體壇發展，所以大家唔使大驚小怪。李生同管理層亦早有共識，低調嘅最終目的，係為咗將品牌同個人（李寧）分開，因為人生始終有盡時，但品牌就可以永恒。
陳偉成話：「其實咁樣咪仲好，李生唔出嚟見大家，咁佢個威猛形象咪永遠咁喺中國人心中！」好一句不許人間見白頭，但華華就諗，李生唔傳聖火，會唔會同火炬手規定要着指定嘅運動服有關呢？因為全球嘅火炬手都要指定着同一款運動衫，而呢件運動衫係由adidas贊助，你叫生招牌李寧着住件adidas，始終都有啲問題。
不過，北京奧運始終係歷史大事，唔同人有唔同諗法，好似另一位內地土生土長嘅運動品牌特步國際（1368）主席兼創辦人丁水波，就着住件火炬戰衣，喺泉州度傳聖火。
mailto:[email protected]