噚日陽光普照，氣溫高達攝氏33度，天文台發出酷熱天氣警告，台劇《惡作劇2吻》一眾演員包括鄭元暢、林依晨、唐禹哲同曾少宗，冒住烈日高溫，走到廸士尼樂園，為無綫娛樂新聞台拍特輯。
雖然拍攝過程只係短短兩個鐘，但係無綫如臨大敵，安排咗20個保安貼身保護佢哋，又唔畀遊客用攝錄機影佢哋，引嚟旅客不滿。炎熱氣溫搞到個個汗流浹背，衣衫盡濕，林依晨拍完一個鏡頭，即刻要開遮抹汗補粉，男士們都熱到木無表情，唐禹哲話：「我們拍了兩分鐘，背脊已不停下雨（流汗）。」
嘆沒時間遊玩
之後鄭元暢、林依晨、唐禹哲同曾少宗到荃灣出席宣傳活動，不過唐禹哲依然係着住嗰套衫，唔通佢唔怕一陣汗味？佢哋同現場過千個fans見面，又齊齊下廚，煮出唔同嘅菜式冧fans，佢哋仲收到唔少fans嘅禮物。
鄭元暢話今次香港之行冇私人時間遊玩，全程都係宣傳，惟有等下次再嚟玩過，不過就一定唔會秘密來港喎，鄭元暢話：「我每次來都有人知道，因為有fans在航空公司做，我沒辦法秘密來。」