炎夏將至，好多人上都寧願匿埋喺室內凉冷氣，但係累積身體入面嘅暑氣就唔係咁容易消，雖然市面嘅消暑飲品林林總總，有冇諗過自製廉價又有益嘅解暑湯，材料就係有「解毒之王」稱號嘅綠豆。
虛寒體質不宜
內地中醫科學院望京醫院內科主任張寧介紹綠豆消暑解毒嘅妙方，佢形容綠豆可解百毒，雖然未必有醫學上嘅臨床研究數據支持，但話綠豆解百毒仲包埋輕微嘅輻射，特別適合長時間喺辦公室對住電腦，又鍾意用手機煲電話粥嘅都市人，每日飲一碗綠豆湯，可以紓緩頭暈同惡心呢類成日纏住我哋嘅都市小毛病。
其實用綠豆湯解暑歷史好悠久，仲可以利濕同解毒，綠豆又可以同其他食材一齊烹調，例如綠豆銀花湯，用100克綠豆同30克金銀花加水煲10分鐘，飲咗可以暑氣全消。
好多人都知綠豆係比較寒嘅食材，究竟飲幾多先唔會過量？張寧就建議身體比較強壯、容易有虛火同熱毒嘅人，可以飲濃啲嘅綠豆湯，一日飲幾碗都冇問題，但如果身體虛寒嘅就唔應該日日飲。
綠豆除咗內服仲可以外敷，夏天出汗多，皮膚容易痕癢不適，可以用綠豆皮煲水浸洗患處，如果患處𢱑損咗，可以磨爛啲綠豆皮敷喺上面，好快就可以止痕好番。
blog主：醫神