有意參加港島區立會選舉嘅民主黨甘乃威、公民黨陳淑莊（Tanya）、同埋葉劉頭馬陳岳鵬，噚日齊齊亮相電視台選舉節目，主持岑建勳對付三位「新丁」絕不留手，諷刺年近五張嘅甘乃威係「叔叔」，又指佢人氣雖然最高，100個港島區街坊有22個識佢，但佢做咗14年區議員，應份有此成績，反而做區議員唔夠半年嘅Tanya，100個街坊有10個識佢，就令人驚喜。
至於陳岳鵬，雖然同葉劉拍住上，可惜零人氣，噚日仲俾人笑佢髮型「大的水」，同「掃把頭」互相輝映，好彩佢為人樂觀好玩得，對此外號唔太反感。其實陳岳鵬都有難言之隱，因為佢個樣太𡃁仔，留「的水」同鬍鬚顯得man啲，佢會從善如流定學葉劉咁捍衞自己髮型，真係兩難。