追數佬認錯同名同姓學生，竟然喺九龍城民生書院外牆噴漆追數，搞到民生書院上咗報紙頭版，受咗兩三日委屈，相信校監、校長會嬲到想喊。好嘞，警方查明真相，知道欠債之人屬於一個教會，而該教會又有在民生書院借用場地，故此追數佬發生誤會。
有「聯王」之稱嘅楊瑞生翁，係民生書院老校友，睇見母校被屈，十分激氣，致電左丁山，話希望傳媒還民生書院清白。啱嘅，傳媒理應尊重事實，報錯咗就要更正番。楊翁話最近將一批昔日港英高官送畀佢之親筆簽名書本，具若干歷史意義，送晒畀民生書院，勝於私人在屋企收藏也。
老牌學校有出名老校友，等於擁有價值甚高之無形資產。民生校友之中，在文教界最出名嘅，相信係前港大校長黃麗松及佢嘅阿哥黃勵文。黃勵文曾在中文大學校外課程部教英語發音。左丁山當時在美資銀行工作，銀行阿二來自加州，第一次到亞洲工作，話聽唔明我哋嘅香港式發音，竟然揀咗左丁山做培訓對象，銀行畀錢交學費，叫左丁山去中大校外課程部上堂學發音。哈，點知美國佬唔明白，黃勵文先生教嘅，係BBC式發音，與美國發音有好大分別。左丁山學得五成，回到銀行與二班交談，佢好唔耐煩，話聽唔明英國口音，叫左丁山講番香港式英語喎，於是銀行算係枉花一筆學費。
我哋未去過英美留學，講英文有香港口音，一啲都唔奇。浸會大學有一位應用語言訪問教授，來自美國某大學，前星期在《南華早報》星期六教育版發表文章，指出香港學校強行教導英語母語口音，浪費資源，大錯特錯。世界上非英美人士講英文都帶有本地口音，即使英國人（左丁山想起費格遜爵士）講英語都未必夠標準啦，意大利，法國人講英語又如何？英語作為世界上最多人識講之語言，以溝通性為主，要人人講到似歷士夏里遜（MyFairLady男主角）你話要用幾多金錢與時間呢？總之英語係我哋第二語言，識聽識講識寫，已係我哋學習努力嘅成果，上述教授話，口音（accent）就係自己嘅文化身份（culturalidentity）。唔須要為自己之口音道歉。