上個禮拜趁得閒，敏妮去咗相熟視光師度驗眼，仲記得年初時佢問敏妮有乜投資書介紹畀佢，今次佢又有新問題。原來佢諗住結婚，同好多香港人一樣，佢都係計劃買樓結婚，雖然敏妮諗唔通，結婚同買樓有乜關係，點解結婚一定要買樓？但既然佢咁信敏妮，問敏妮意見，咁點都要認真啲、搵啲專家問吓。
對於地產大好友光頭仔嚟講，佢一聽到呢個問題，第一時間嘅回應完全係敏妮預計之內，「用嚟自住嘅樓，我覺得幾時買問題都唔大，你認為樓市會跌，但我估點都唔會跌兩、三成。就好似97年摸頂買番嚟嘅樓，𠵱家都返到家鄉啦！」佢仲以佢住緊層樓嚟做例子，話單位年初至今，都升咗幾成。
敏妮都認同，買樓自住就好似長線投資一樣，唔係睇一兩年走勢，但係咪好似光頭仔所講，買樓長線一定會升？任何投資都一樣，價格升跌只有一個原因，就係睇供求。
置業要睇投資價值
雖然話係自住，但到咁上下你可能會考慮換樓，所以即使自住，敏妮都勸大家視作投資嚟考慮，即係最緊要睇有冇得升。
講到供求問題，有人即刻會搬出發展商近幾年最鍾意用嘅供應數字出嚟，話𠵱幾年投地難，未來幾年樓市供應會減。其實問10個專家9個半都會同你講買樓最緊要三個因素，就係location、location、location，地點咁重要嘅原因亦因為供求。
就以光頭仔住緊層樓為例，佢話自己層樓市況差時雖然都有調整，但幅度唔大，到樓市一升，佢層樓就升得好快。光頭仔家住西環，港島區樓嘅樓價一向都跑贏九龍區，原因正係港島區冇新嘅土地供應，又唔可以填海增土地，只可以靠重建，但有好嘅地段都用嚟做商業，或者建豪宅，所以港島區嘅樓只會越賣越貴。
地點勝過一切
敏妮家住嘅尖沙嘴區亦一樣，呢幾年嘅新盤就只有金巴利道26號同港景峰，就係因為新供應有限，以敏妮自住嘅物業為例，就好似光頭仔所講，個市跌，佢嘅跌幅有限，但個市升，佢就升得快過人兼勁過人。
至於另一個反面例子，限於篇幅，明天先同大家分享。
http://wanmanli.com/blogs/