「長毛」梁國雄有名你叫，最令人印象深刻嘅當然係佢一把長長嘅「秀髮」。如果八方冇記錯，佢除咗早幾年坐監時剪短過頭髮之外，長毛一直都係以長髮look示人；就算入咗立法會，佢都堅持保留一把烏黑長髮，可想而知佢幾咁惜「髮」如玉啦。
不過，長毛噚日喺民陣7.1記者會上宣佈考慮剪光頭。唔通佢想改變形象迎戰選舉？佢話當然唔係隨隨便便去剪髮，佢開出嘅先決條件係：7.1當日如果有成10萬人上街，佢先肯即席剃頭。願意為7.1做出重大犧牲，長毛都算唔話得。
籲政治新貴捐人工
副局長同政治助理單嘢搞到杰撻撻，相信唔少人都會因為呢股憤怒而上街。民陣副召集人孔令瑜話，民陣家陣嘅營運資金連一個副局長嘅月薪，即係連最低嘅20零萬都冇。既然咁多副局長同政治助理話唔care份人工，孔令瑜希望佢哋向民陣捐出人工，唔好嘥晒納稅人嘅錢。佢仲邀請班政治新貴一齊上街，覺得咁樣先係真正嘅實習機會，唔知班新貴肯唔肯近距離接觸群眾呢？