人不可以貌相，留學美國高等學府，精研法國紅酒嘅政務司司長唐公子，風度翩翩官仔骨骨，估唔到都有市井一面，前日喺立法會議事廳內，解釋點解政府搵個社區中心收容被驅逐出酒店嘅旅客時，竟然以「嗰班友條條fing喺街度」形容無辜落難遊客，高官喺議事廳內講嘢咁粗俗，既唔尊重遊客，亦有失身份，呢條友真係影衰香港。
議員當日質問官員點解咁待慢旅客，呢條友懶幽默咁講，由於酒店被封後，「嗰班友條條fing喺街度，揸住行李，攞住個篋」，有關方面遂立即開放梁顯利社區中心安置佢哋。以事論事，第一時間搵地方安頓旅客錯唔晒，唐公子指旅客係「嗰班友」卻大錯特錯，言者無心，聽者有意，最怕「嗰班友」返到家鄉唱衰香港，話香港有個口不擇言高官啫。
可能有政治後着
唐公子可能覺得自己好風趣，又話嗰班友「條條fing」，喺議事廳內咁講嘢，真係聽到人擰晒頭。據專家講，條條fing其實有「男性性器官搖晃」嘅意思，引申形容有啲事情未有着落，照咁講，唐公子措詞好貼切，弊在佢係高官，唔係旺角蠱惑仔，咁講唔止自貶身份，仲令香港蒙羞！
唐公子精通西方品紅文化，理應出口成文，今次咁失斯文，無疑自毀公子形象，其實談吐得體有幾難，上述粗鄙句子，只要改為「尊貴的米飯班主流落街頭」咪得囉。由於唐公子亂噏廿四早有前科，將昂坪360讀成「衫碌拎」早成全港笑柄，所以八方促請唐司長自行罰抄一千幾百次，若有再犯，呢條友應該引咎辭職。
唐公子前晚喺山頂官邸宴請民主黨議員同中常委，八方聽聞席間有人恥笑呢條友講錯嘢，唔知係咪自知日間失言，據講唐公子成晚冇乜開聲，反而佢太太好熱情，逐個人敬酒，何俊仁、李永達幾乎俾小唐太「隊冧」，有民主黨人形容小唐太係「酒筲箕」，連飲廿幾杯紅酒面不改容。
世事無絕對，八方唔排除唐英年今次自毀公子形象有政治後着，「疑似特首候選人」梁振英支持最低工資立法，頓成基層英雄，唐公子要同佢一較高下，又怎能不放下身段？否則進駐唔到禮賓府條條fing點算？
mailto:[email protected]