警務處前助理處長黃敦義去年接任建造業訓練局（現稱建造業議會訓練學院）行政總監一職，好多人批評佢行外人領導行內人。為加強內部溝通，黃Sir搞咗個「與總監茶敍」嘅聯誼活動，又喺院內聯網設立討論區，由佢親自出馬解答同事疑難。八方日前到黃Sir辦公室同佢傾偈，唔少員工都同佢打招呼嗌「黃Sir，早晨！」睇嚟佢同同事嘅關係算係唔錯。
黃Sir喺警界30幾年，查案就叻，但喺建造業就係初哥。佢話一早預咗俾人鬧，上任後花咗唔少時間惡補建造業知識，𠵱家講起呢行都成個專家咁款。對於近期警隊唔少風波，曾經係PPRB阿頭嘅黃Sir話唔想評論，但就承認有警隊同事曾經向佢訴苦；佢認為警方喺處理事件上冇做錯，但有啲訊息喺傳媒層面出唔到嚟，所以公關工作可以再做好啲喎。