北京釋出善意，邀請天主教香港教區助理主教湯漢出席京奧開幕禮，教區禮尚往來，亦低調咁伸出橄欖枝。最新一期教區官方刊物《公教報》，有則值得細味嘅消息，原來教區6月初舉行「健體迎奧運」十項全能比賽，據講係教區首次舉辦同類型活動。
據報道呢個比賽有逾百位修道人參加，佢哋平日衣冠楚楚，忽然着T恤、短褲、波鞋好罕見，由於大部份人疏於運動，所謂「十項全能」只係四人接力、射三分波、同乒乓波等小兒科玩意，但勝在迎接奧運熱情高漲，意大利籍嘅施永泰神父話，為提高欣賞奧運趣味，已經熟讀內地同香港運動員資料，自己家鄉意大利運動員嘅資料反而冇咁熟。活動搞手終身執事宋雲龍，更呼籲教友多做運動迎接奧運。