香港大學專業進修學院同香港話劇團合作，前晚喺文化中心舉行為四川賑災籌款嘅《德齡與慈禧》專場，連久違了嘅大美人林青霞亦拎住個BV白色手袋，同著名作家龍應台齊齊嚟睇話劇。青霞一見到導演楊世彭，就即刻捉住對方傾偈，仲成個小fans咁，話之前想睇齣劇但就撲唔到飛，今次有得睇，好開心喎！ 呢次慈善專場演出共籌得善款累積超過63萬，較原定目標高。港大專業進修學院話，原本今次慈善首演專場係為咗籌募獎學金，但四川災情嚴重，於是決定將善款改為捐畀苗圃行動。