工聯會王國興冇得再搭「政治順風車」，今年9月要靠自己直選新界西，八方聽聞工聯會本來搵咗葵青區議會副主席麥美娟Alice做樁腳，試圖吸納中產同專業票，溝淡王國興草根形象，點知呢個樁腳出師未捷腳先斷，認真唔好彩。
Alice同八方講，兩星期前因為追小巴而跌斷腳，目前仍然留醫，相信出院後有段長時間要坐輪椅，可能要請專人推輪椅照顧佢。至於佢會唔會參選，聽聞有關方面正在審慎考慮之中，視乎康復進度再決定。
Alice話今次係無妄之災，事關佢一向坐的士出入，兩星期前離開辦事處時，忽然想搭小巴體察民情，可能天雨路滑，追小巴時不慎跣低，呢一跣唔嘢少，右腳折斷傷勢嚴重，做咗兩次手術，右腳𠵱家鑲咗七粒螺絲、兩塊鋼板同幾條鐵線，醫生話康復需時，肩負唔到做樁腳任務事小，影響日後活動能力事大，佢坦言都幾擔心。王國興掛工聯會招牌應該夠贏，少個樁腳唔係太大問題。