在卑利街街市的唐樓工作室租約期剛過一半，室內那個所謂的入則平台已經遭嚴重水淹了好幾次，水靴也添置了，不是趕時髦而是實戰實用。為了徹底解決百年不遇老問題（有次還在水窪中撈到全身浸泡到發白的老鼠屍體！）興起了買樓的想法。穿逡於環頭環尾，在地產公司櫥窗前探頭探腦，上網直擊樓市傳真。這才發現，八萬五的「餘威」確實不復存在了，樓市打從「做好呢份工」的曾班子上場以來，翻了好幾番。而我們那個涼浸浸工作室，亦早已經從老業主手上轉賣了，價錢叫我們咋舌。往地產舖收風，walkup樓即是毅行到抽筋那種連天台唔包漏水的唐樓，簡直像每天都是黑色暴雨地水漲船高，兼且有價無貨。
我喜歡擺花街，那是開埠初期最多白俄洋胭脂貨腰的煙花地，擺花與塘西都夠經典的。但地產職員提起擺花街就面黑，以為你混吉，因為街道短，吉盤極缺，有的話，也都是連職業炒家都呻黐線的價位。奧卑利街，長命斜喎，唐樓叫價九百萬你見過未！另一條殖民地風水街伊利近呢？業主動輒反價，難做買賣啊。荷李活道這條冬青大街被鬼佬盯得很緊，有盤都輪唔到同飲香港水的自己友入市。樓市火陽春，更有機會多一批年薪幾百萬的副局入市搞局，怎麼辦？俾個機會我好嗎，買樓而已，唔係做助理。