《蘋果》前日13周年報慶，八方嘅同事發揮創意，設計咗個廣告贈興，回顧十幾年嚟有邊位權貴曾被《蘋果》口誅筆伐，呢個廣告表明《蘋果》插人作風唔會變，其實，《蘋果》俾人封殺嘅遭遇都冇改善過。
自我審查最令人不安
據八方了解，呢個廣告除咗喺《蘋果》刊登，仲打算喺巴士站、港鐵等展示，不過有關代理商同港鐵卻拒絕畀《蘋果》賣廣告，佢哋嘅理由，竟然係指廣告鼓吹暴力，會引起不安！
呢個廣告毫不血腥，八方同事左睇右睇，都唔覺得廣告有任何部份鼓吹暴力喎，遑論引起不安啦，就算一啲法律界人士、廣告界人士睇過，都唔認為有任何問題。
既然咁多人睇完個廣告都認為冇問題，究竟港鐵、巴士公司擔心引起邊啲人不安呢？最令人不安嘅，其實係自我審查，隨便封殺廣告。