廖碧兒從138磅肥公主變成115磅的S身形索女，大隻妹踢走23磅肌肉及脂肪，談何容易。最肥時，她還要打出大片肉背拍出浴戲，慘被彈到體無完膚。她又曾因廢寢忘餐拍劇，暴瘦虛弱要入院吊鹽水。由肥到瘦、翻脹再瘦，廖碧兒咬緊牙關持之以恒做gym、玩健身波加單一食療法，終以八年時間打贏這場減肥血戰。 撰文：朱倬誼
廖碧兒是2000年溫哥華華裔小姐競選冠軍，當年她帶着一身babyfat、138磅的體重來港參加國際華裔小姐競選，個個都稱呼她做肥公主，但她一於少理，繼續大吃大喝，是港人少見多怪，拍在高頭大馬的外國女孩中，她不知多苗條。
130多磅打拳參賽
廖碧兒日前說：「肥公主係我嘅公開花名，我不單止肥，係好多肌肉，因為我有跳舞、喺大學時又打開boxing比賽，要超過130磅先入到圍。喺外國嚟講咁嘅體重唔算大隻，我5呎7吋半高，130磅係正常，喺外國啲人係注意健康多過瘦嘅。」廖碧兒是大隻底，骨架較橫，她說得理直氣壯，但她靠靚搵食，香港又吹纖體風，不得不向現實低頭，減啦！
01年廖碧兒拍處女作《皆大歡喜》，肥得來一身肌肉，即是大嚿。無綫把心一橫，開始安排她擔任纖體代言人，她說當時別人都不斷提醒她：「會叫我留意食嘢，始終大隻上鏡，望埋去又肥10磅，咁我咪成150磅出鏡？驚㗎！我唔係驚人哋話我肥，係唔想人哋錯覺我肥，啲人話見我真人瘦咁多，我都好希望出鏡同真人可以差唔多。」
其後廖碧兒分別為不同纖體產品或公司擔任代言人，試過各式各樣、有效無效的減肥方法，結果搞到時肥時瘦。最麻煩的是她來港後因水土不服纏擾四年，腸胃非常敏感，一旦吃減肥產品，搞不好便隨時攬住馬桶做人，由朝屙到晚。
虎背熊腰惹劣評
廖碧兒陷入減肥迷茫期時，心繫的只有拍劇及做好纖體任務，她說：「我試過好多唔同方法，有啲係配合飲品、藥物、做機，又有啲配合量脂、度高，每個禮拜都要測，但好難keep到咁嘅編排，除非唔使做嘢啫。我本身又好鍾意食嘢，出外景拍戲要食飯盒，都唔到你揀，我拍古裝打打殺殺，唔食嘢會唔夠力，所以咪時肥時瘦。反而唔使開工會瘦，因為有時間做機、做治療，忙起上嚟好難，我對食藥麻麻哋，試過一停反彈，減肥飲品都係，一停飲就會肚屙，有少少唔舒服，可能有啲人唔會，因為我嘅腸胃好易敏感。」
翌年廖碧兒接演電影《我老婆唔夠秤》，片中一幕露背冲凉的戲份，暴露她的虎背熊腰、肥背不見骨，遭人狂笑兼惡評如潮。後來她的起心肝，瘋狂做運動消脂，她說：「我狂跑步，一日去gymhouse跑兩個鐘，跑到濕晒，唔食嘢唔飲嘢。我第一次瘦，係去到108磅至113磅，108磅係入咗院。」03年她同時拍攝《皆》劇時裝版及《律政新人王》，終於捱到瘦夾殘，她說：「當時我代言一間纖體公司，自己又想再瘦，忙起上嚟唔食嘢。有時好唔夠瞓，寧願瞓覺都好過嘥時間食嘢，結果我好弱，要入院吊鹽水。其實我唔係刻意減肥，係好搏殺工作，忘記咗自己嘅身體。𠵱家大個咗，就知道要錫住自己。」
去年廖碧兒又翻脹，體重升至130磅，在肥公主邊緣徘徊，原因是拍攝《舞動全城》休息不足加不停食，肌肉重現，她苦笑：「我覺得好肥，跳得多食得多，做嘢又狂食，九日冇瞓覺，腫到死，然後入醫院三次，都肥喎！因為跳舞跳得太犀利，肌肉好重，拍戲食消夜最慘，最肥。」
眼前的廖碧兒體重115磅，一副S形身形，十分健美。她靠玩健身波鍛煉線條，在健身老師指導下練習各類健身機械，這是正確喼弗第一步，她說：「我好鍾意做運動、跳舞，唔郁會唔舒服，但點樣可以冇咁大隻呢？有方法，要配合唔同運動。齋做舉重、力量嘅練習會令肌肉向橫發展，我本身肌肉好易橫，又鍾意食，經期都令我好腫，最弊我哋出鏡冇得控制，所以先要注意飲食。」她大多時候會在晚餐選擇單一食療法，只選吃一種肉類或菜類，因單一食物較易消化，能減輕腸胃負擔。
爹哋愛心湯滋補
廖碧兒續說：「𠵱家我一星期做兩次gym，出一身汗會舒服啲。呢排我去一間新嘅減肥公司試啲新機，慢慢打鬆啲硬肌肉，本來我身後面有啲唔平嘅脂肪，一笪笪，喺patpat最明顯，做機三日之後平番。其實做機會有番線條，每次做完之後會好好瞓，瞓醒做個facial，成個人就會好fresh。」
阿爸湯水則是廖碧兒的健美秘方，由於她母親身在加拿大，每次返港例必執很多種湯包材料，交由丈夫煲湯給女兒補身，廖碧兒笑說：「媽咪驚我唔食嘢，咪擺定一包包嘅湯料喺度，叫爹哋煲畀我飲，有菜亁湯、廿四味，我契媽仲教埋我爹哋燉燕窩㖭呀。」
攝影：陳順禎 化妝：PaulineofBeautyTech
髮型：WardenofILColpo 場地：黃埔博藝會
碧兒均衡餐單
藝人的減肥餐單大多由早到晚高度戒備，但廖碧兒只着重均衡營養，不會太待薄自己，正如她所說：「我𠵱家29歲，身體功能都要開始照顧啦。」所以她沒有太抑制，除早餐外，其他時候七成飽，不吃tea不消夜。她吃澱粉質或難消化的食物身體較易腫，水果、蔬菜及肉類令人體易吸收，不需吃太飽也可快速回復體力。
廖碧兒提供
早餐：多士、烚蛋白、香腸、粟米，果汁或咖啡一杯。
午餐：湯、菜、飯、米粉，隨意。以喝西餐湯為多。
晚餐：菜或肉+飯。肉、菜二選一，肉類可選擇煎扒、焗雞。
心水食肆
在加國長大的廖碧兒偏好西餐是理所當然，但留港多年，她的飲食口味多少被同化，想不到她竟會爆出美心大酒樓是心愛食肆之一，surprise！
長Pizza即叫即做（中環CafeO）
主打各國fusion菜，pizza是招牌美食，鋪上番茄蔬菌、薄薄長長的pizza，更能吸引碧兒，她說：「我鍾意食佢哋嘅薄pizza，可以整個pizzanocheese，三呎咁長都整到，菜又新鮮，係即叫即做。間cafe好西式，仲有蛋糕、沙律、新鮮生果汁同生果茶，你想heavy、唔heavy都有，飲個湯又得，heavy可以食芝士，仲有紅酒飲㖭。」
最愛火鍋點心（美心大酒樓）
想不到是半唐番的碧兒，對中菜也情有獨鍾。港人時興打邊爐，她更絕對狂熱，而且最愛光顧格調平民的美心大酒樓，她說：「美心可以打邊爐，我又鍾意食菜同點心，一個地方可以搞掂晒三樣嘢，但我多數係打邊爐，會叫桂花蚌、牛肉、貢丸、菇同豬膶。」
必食唔腥海膽（日本餐廳KyotoJoe）
碧兒吃了不潔食物會超快肚痛，她愛吃海鮮，但海鮮不新鮮即攞她命，所以她推介中環蘇豪區的KyotoJoe：「佢哋嘅海鮮係每日入貨，好新鮮、亁淨。我平時唔食海膽，但去呢間會食，因為新鮮、唔腥，佢會畀啲紫菜，自己放啲海膽落去，再落啲柚味嘅鹽，係好味到爆。我每次去唔使嗌嘢食，佢哋會設計我想要嘅食物，until我話cut。」
娛樂資料：庫甜姐兒有苦自己知
廖碧兒出道至今，身形時有變化，瘦身之餘因壓力大，曾捱壞身體入院吊鹽水，苦不堪言。不過其甜美笑容歷久不變，相信是她長期保持心境開朗的緣故。
鬥靚入娛圈
01年廖碧兒代表溫哥華來港參選華裔小姐，以大熱姿態奪冠。當時她在比賽中大跳現代舞，拗腰又做一字馬，結果還奪得花都綽約大獎。
初演儍大姐
廖碧兒甫出道便有傳獲六叔邵逸夫欽點力捧，先與郭富城合作拍攝MV，其後在無綫劇集《皆大歡喜》中演刁蠻公主，其儍大姐形象深入民心。
瘦身展美態
廖碧兒被狠批「大隻」，02年決心瘦身。不過要靚還得付出沉重代價，除每日做運動之餘，又要節制飲食，箇中辛苦，實不足為外人道。
上位壓力大
廖碧兒成為當家花旦，壓力有增無減，去年拍攝《舞動全城》時不自覺地暴飲暴食，最終體重回升至130磅，還試過入院吊鹽水。
資料來源：《蘋果》資料室
