細數第一代偶像派組合小虎隊必定榜上有名，三位成員林利、孫明光和胡渭康，當年迷倒萬千少女，更代表香港參加東京音樂節揚威海外，不過演出前林利嚇到撒了一褲子尿上台唱《忍着淚說Goodbye》。年逾40歲的林利歷盡星途浮沉，終於在今年回歸無綫拍劇，他表示：「攞苦嚟辛係悉心經營嘅人生鍛煉。」
撰文：朱倬誼
小虎隊的成員林利固然不是05年港姐季軍林莉，但好笑的是月前他首日重返TVB娘家報到，駐守的保安一面疑惑攔着他，並說：「你係林莉？女人嚟㗎喎！」逗得他哭笑不得。他說：「當時代變遷就要跟住行，唔好唔認老，喺歌壇你係唔得就係唔得，唔好撐，要變㗎！」
面對巨星腳震
當年小虎隊解散後，林利去了台灣發展，晃眼18年。近日無綫邀他參演新劇《學警狙擊》，但觀眾只記起他和胡渭康、孫明光合唱劇集《新紮師兄》主題曲《伴我啓航》及《忍着淚說Goodbye》，及記得他們穿着粉色吊腳運動裝或超短波褲，動作與歌詞完全分裂的MV畫面。在80年代這些畫面稱之為陽光氣息，但到了21世紀就叫騎呢、娘爆，近乎惡搞呢！林利想起當年「經典」一幕笑說：「好娘！得啖笑，不過係個幾好嘅回憶。」三頭小虎早已各散東西，極少聯絡。他稱：「孫明光不嬲冇做呢行，拆夥後佢去咗日本讀服裝設計，𠵱家喺間上市公司做嘢。胡渭康就最精叻，又鍾意表演。」
82年本地樂壇受東洋風吹襲，效法日本idol路線的小虎隊代表香港參加東京音樂節，但威水背後原來嚇到林利標尿，他笑言：「嗰次上台前真係驚到瀨尿，震晒！第一次見到咁多人，有西城秀樹、吉村晃司、清水宏次郎、歐陽菲菲，我哋一條青草咁，咪瀨囉！」林利續說：「嗰時好興登台，華星成日安排我哋去lounge唱歌，一晚走幾間，benz接送，乜嘢節目都上，《港姐》、《婦女新姿》、《430穿梭機》等，唱《忍着淚說Goodbye》唱到想嘔，只不過當時唔識得儲錢，不過都叫風光過嘅！」可惜小虎隊難逃拆夥命運，林利道出原因：「孫明光唔鍾意表演，我就腌尖兼麻煩，胡渭康最適合做藝人，佢講得、唱得、跳得，我哋諗嘢同個性都好唔同。」
平衡自己心態
小虎隊玩完，林利發展停滯，他改名林立洋轉戰台灣，拍劇及出唱片。不過99年他與台灣女模范靜蕙結婚後，事業發展平平，他在當地曾任職導遊、日本餐廳侍應生及健身中心接待員。林利說：「托盤仔（侍應生）係我特登做，背後意義係平衡自己心態，做番個腳踏實地嘅人。以前拍戲賺錢好易，但原來5,000蚊一個月我都捱到，我唔想拍嘢，有少少要擋住自己嘅命運，想做番啲實在嘅嘢，唔想心靈咁虛浮。我將自己賣去另一個舞台，利用托盤仔打開道門，之後好多品牌搵我，終於揀咗去健身中心做接待員學管理同公關。」
現時林利全職擔任一間美髮產品公司的公關經理，兼職拍劇，令他感覺充實，「我𠵱家開心㗎，心入面把尺點都得，40幾歲先至feel到自己周身刀，我鍾意𠵱家嘅生活，唔使搵好多錢，搭吓巴士、間中開支紅酒飲吓，感覺好優游。我成日由零開始，我唔係轉行，係轉變自己嘅人生啫！」
娶台模離異A片慰寂寥
出生於北京的林利，曾先後與李麗珍及台灣打女楊麗菁拍拖，後來與年齡小他10載的台灣女模范靜蕙結婚，但僅維持了5年，離異原因是兩人欠缺溝通、性格不合。
有傳當年林利跟珍妹掟煲後曾為情自殺，今天林利親自解畫：「冇，好難過就有，嗰時我係𡃁仔，佢都係得18歲，分手係性格唔夾，佢脾氣硬倔倔，加上大家年紀仲細。我哋分手嘅時候冇話要生要死，只係飲酒、自隊、瞓覺囉！」至於和楊麗菁的一段情，林利則說：「嗰時我24歲，佢啱啱嚟香港拍戲，日日受傷，我國語又OK，照顧佢，佢個人好nice嘅。」
「唔通叫雞呀」
林利和前妻分手後仍是朋友，他覺得雙方緣份未盡，「係我欠咗佢，關係一路keep住好好，大家都享受單身，但唔排除以後一切嘅可能性。」離婚後的林利一直做寡佬，年前他接受訪問時語出驚人，說沒女友的日子，便靠看A片度日，林利直認確曾說過，「當時記者問我離咗婚幾年，都冇同其他女仔一齊，你都會有需要㗎？我咪話自己搞掂！就咁囉。呢種新聞喺台灣冇乜嘢，我覺得香港新聞保守啲。睇A片咪睇A片囉，個個都睇，唔係點呀？唔通強姦？媾女？一夜情？叫雞呀？冇一樣好過睇A片啫！」
娛樂資料庫：陽光男孩舞動青春
小虎隊可算是香港最早期的偶像派組合，1984年無綫新秀歌唱比賽出身的林利、胡渭康及孫明光，仿效日本當紅組合苦柿隊，組成以陽光男孩形象配合青春舞步的三人組合，曾經紅極一時。他們演繹的《新紮師兄》主題曲《伴我啓航》及《忍着淚說Goodbye》，更是耳熟能詳。
85年小虎隊與日本組合少女隊更合演《青春節拍》，可惜組合發展未如理想，於一年後解散，三人分道揚鑣，林利到台灣發展，胡渭康則以拍劇為主，最受歡迎的孫明光曾獨立發展，亦未如理想，其後到日本留學。
