落足半個月雨，勁翳焗濕熱，冬瓜夏天當造，味甘肉清透，清清哋最啱食。從中醫角度講，夏天濕熱人易攰，食冬瓜消暑解渴醒神開胃。嫌冬瓜無味？No啦，超豪冬瓜盅好味到啪啪聲，我話嘅。
記者：洪偉順
攝影：伍慶泉、陳盛臣、王文忠
模特兒：Yan、Koby
鳴謝：關之義中醫師、許永鑫醫師
孕婦忌食冬瓜
咪以為冬瓜幾蚊斤係下欄嘢，許永鑫醫師咁話：「冬瓜夠正氣，配荷葉煲湯水最補，就算唔煲湯，冬瓜連皮去心煲水一樣消暑解渴。」關之義中醫師直頭當佢係寶㖭，仲用八個字─消暑去水、利尿去濕─總結冬瓜食療好處。夏天，人出汗，會自不然飲好多水，「水係要飲，但飲太多會令人體出現『水液不平衡』情況，過多水份排唔出體外，人會出現水腫、腎濕。食冬瓜，可以幫助排走多餘水份，令人體回復『水液平衡』。」不過關醫師叮囑，腎弱、產前產後及老人家要盡量少食用冬瓜，食過量會傷膀胱、引致夜尿繼而影響睡眠質素，孕婦亦有可能出現小產傷胎情況。都係嗰句，食乜都要適可而止，先係養生之道。
餡料矜貴味道唔寡
「唐閣」張健明師傅話：「冬瓜清淡，宜配味濃食材。」所以佢專登用金華火腿、瑤柱做冬瓜盅，「一蒸，冬瓜吸收晒食材精華，口感豐富味道濃啲，食落唔寡。」冬瓜盅快餐店都有得食？我夠知咯，但點同「唐閣」落足珍貴食材比呀，擺上枱都零舍氣勢磅礡，呢道極品消暑菜，普通街邊貨差幾廿個Level啦。（尖沙嘴北京道8號朗廷酒店1樓/23751133）
百寶龍王冬瓜盅$650
收得你六嚿半水，當然用料十足，先蒸冬瓜三小時，再放龍蝦、田雞、金華火腿同瑤柱等十種餡料蒸半小時，湯水吸盡食材精華，街邊啲味精水無得比。須即日預訂。
白玉球燜釀豆卜$160
珠三角家鄉菜，白玉球即球狀冬瓜肉，攪碎蝦肉、豬肉釀入豆卜，蒸十分鐘上碟，色香味俱全。
上湯科甲瓜$180
六十年代懷舊菜，何謂科甲瓜？冬瓜件對切但唔完全切斷，夾一塊雲舫火腿是也，最後淋上湯芡，爽脆！
食客有Say
「本身好鍾意食冬瓜，夠消暑呀。」
「冬瓜盅超好味，白玉球好清淡。」
清蒸最原汁原味
「冬瓜同海鮮，係天仙配。」「Cucina」嘅歐陽松基師傅入廚超過三十年，「每種食材都有本身屬性，冬瓜無乜味，夏天又係食海鮮好季節，海產鮮味最配合到冬瓜軟熟腍口感。」蒸炒燜燉炸，佢獨愛蒸煮，原因：「蒸，最能夠保持食物原汁原味。」簡單就是好，明白晒。（尖沙嘴海港城馬哥孛羅香港酒店6樓/21130808）
腿茸官燕蟹肉冬環羮$288
金華火腿碎茸、頂級官燕加冬瓜茸，微火煮埋一碗，成碗羮色澤晶瑩，好味到囗囗聲，好養顏。
脆貝海鮮冬瓜盞$168
脆貝即炸過嘅亁瑤柱，冬瓜挖肉釀入鮮蝦、帶子，煮熟撒脆貝，成道菜一個字──爽。
龍蝦水晶卷$288
冬瓜切片，捲大大塊鮮龍蝦肉，半透明滑嘟嘟，蒸熟淋芡汁上碟，龍蝦肉鮮甜彈牙，味道同冬瓜好夾。
食客有Say
「冬瓜好滑，滑到差啲夾唔起。」
「水晶卷清透，睇得穿入面，得意。」
熬湯底唔用味精
「快樂廚房」主腦Jack哥，堅持唔用味精，有超過二十年煮泡飯經驗，用自己熬嘅豬骨湯做湯底，每碗冬瓜泡飯都即叫即整，一年四季都食得咁健康。（天后銅鑼灣道144號地舖/25716168）
鮮蔬瓜粒湯飯$40
豬骨湯底，紅蘿蔔、冬菇、西蘭花同冬瓜粒做餡料，可轉素菜湯，變成百分百蔬菜泡飯。
紅燒豬扒瓜粒湯飯$40
豬扒唔加生粉，醃到入晒味就直接落鑊炸五分鐘，鎖住肉汁好Juicy，啖湯鮮味十足，十個正。
食客有Say
「自己倒米，泡飯幾稀幾杰自己揀。」
嗒真黃金飯粒
「三姐海鮮酒家」最出名係魚湯，呢個三姐招牌老火湯，每日用石斑骨煲四小時，魚味濃郁，泡飯湯底保證營養高味道好，冬瓜粒夠新鮮，金黃飯粒拖過油，做出來嘅泡飯真係超鮮甜。三姐話：「炸黃金飯粒要睇實火候，一唔小心隨時變飯焦。」煮飯粒都咁刁鑽，果然粒粒皆辛苦，呢碗泡飯，記得食到照鏡至好走呀。（深水埗褔榮街9-11號地下至2樓/27762003）
冬瓜魚翅卜卜脆$128
上等勾翅、大大隻蝦仁加冬瓜粒做餡，飯粒炸完脆卜卜，色澤金黃靚到絕，湯底好重魚味勁鮮甜。我知，泡飯嚟講係貴咗啲，不過真材實料，點都要豪一次。
