馮仁昭四圍超：
烈火英雄多災多難　王喜石屎扑頭等賠錢 - 馮仁昭

王喜、鄭嘉穎及胡杏兒噚日喺黃竹坑邨拍無綫新劇《烈火雄心3》嘅爆炸救火戲，無綫仲租用咗6部消防車、1部救護車同30多名消防員到場，雖然真正拍攝爆炸場面時，兩個男主角完全唔需要親身上陣，但係佢哋兩個都話年紀開始大拍得好辛苦，嘉穎仲話日日都要飲健康飲品去補充體力，問到王喜拍咗成個月係咪瘦咗，佢講笑話：「我都冇肥過！」

杏兒俾人撩

不過王喜都算黑仔，繼之前喺西藏發生車禍之後，佢話前兩日拍一場吊威吔救人嘅戲份嗰陣，俾上面跌落嚟嘅石屎扑傷頭，佢話：「流咗少少血仲起咗個瘤，好彩當時有真正嘅救護人員喺度，我都有同公司報告，所以都會報工傷，如果到時賠五萬蚊以上，我就請大家食飯，總之今次真係硬食石屎。」
另外，噚日成班真嘅消防員見到胡杏兒時，個個都睇到金睛火眼，王喜仲幫班消防員撩杏兒話：「杏兒，佢哋話你真人又瘦又靚，問可唔可以攞你電話。」搞到杏兒不知幾尷尬話：「畀公司電話呀。」事後杏兒講笑話因為現場冇女演員，所以佢哋先至咁講。